L. ANNAEĪ SENECAE EPISTULA AD LŪCĪLIUM XXI IN LIBRŌ SECUNDŌ & 7-9
[7] Nē grātis Idomeneūs in epistulam meam vēnerit, ipse eam dē suō redimet. Ad hunc Epicūrus illam nōbilem sententiam scripsit quā hortātur ut Pythoclēa locuplētem nōn pūblicā nec ancipitī viā faciat. 'Sī vīs' inquit 'Pythoclēa dīvitem facere, nōn pecūniae adiciendum sed cupiditātī dētrahendum est.' [8] Et apertior ista sententia est quam <ut> interpretānda sit, et disertior quam ut adiuvānda. Hoc ūnum tē admoneō, nē istud tantum existimēs dē dīvitiīs dictum: quōcumque transtuleris, idem poterit. Sī vīs Pythoclēa honestum facere, nōn honōribus adiciendum est sed cupiditātibus dētrahendum; sī vīs Pythoclēa esse in perpetuā voluptāte, nōn voluptātibus adiciendum est sed cupiditātibus dētrahendum; sī vīs Pythoclēa senem facere et implēre vītam, nōn annīs adiciendum est sed cupiditātibus dētrahendum.[9] Hās vōcēs nōn est quod Epicūrī esse iūdicēs: pūblicae sunt.
Comentarios
Publicar un comentario